I bekuar nga natyra dhe i lakmuar nga turistët e huaj Ksamili është padyshim një nga destinacionet më të kërkuara në Shqipëri. Por në krahasim me vitet e kaluara, operatorët turistik tregojnë se ka një rënie me rreth 40% të numrit të turistëve për periudhën e fillim-korrikut.

Madje edhe turistët e huaj që pushojnë në Ksamil, kanë rezervat e tyre sa i përket çmimeve dhe mungesës së plazheve publike. Sipas të dhënave, në këtë periudhë të muajit, shezlonët në plazhet e Ksamilit variojnë nga 20€ deri në 100€.

Duke parë këto çmime stratosferike të shezloneve, qeveria Rama duhet të reagojë me urgjencë për të lënë më shumë hapësira publike në plazhe ashtu siç ndodh në gjithë Europën, në mënyrë që këta “zaptues” mos e trajtojë bregdetin si pronën e tyre private.

“Vij nga Italia, me pëlqen shume këtu, por diçka që nuk shkon këtu janë plazhet, të cilat janë të gjitha private, në Evropë ka shumë plazhe publike ku mund të akomodohesh me gjërat e tua. Këtu shezlonët janë të shtrenjtë shumë. Mora një apartament me çmim të mirë për të kaluar pushimet, ushqimi është i mire dhe çmimet deri diku mire, por janë te njëjtat çmime si në Itali”, tha një pushues për Euronews Albania.